මේ ගමන දිගු වෙන්න පුළුවන්, කෙටි වෙන්නත් පුළුවන්
එහෙම දිගු,කෙටි ගමන් වල කළු, සුදු අහුමුළු සොයා පදවන යාත්‍රාව

Tuesday, October 31, 2017

තැන

දැන් මම පහු කෙරුවේ අපි අත් අල්ලන් එනකොට දවසක් නකුටු බල්ලකු මැරි හිටි තැනය. මැස්සන් විසින් බලු කුණ භෝජනාගාරයක් කර ගත් තැනය. ඔබ කිසිදු පැකිලිමකින් තොරව මළ කුණ උඩින් පැන්න තැනය. නහය වසා ගන්නට මම ඔබේ අත අත හැරිය තැනය. "ඊයා" යැයි මම කියු තැනය. "කෝලං" යැයි ඔබ කියු තැනය. මෙතැන සියල්ලේ අරම්භය සිදු උන තැනය.

දැන් මම පහු කෙරුවේ නනාගේ තොසේ කඩය තිබෙන තැනය. හවසට අපි තේ බොන්නට හුරු වී සිටි තැනය. ඔබ සොයා ගෙන වැරදි යැයි නම් කර ඇනුම් බැනුම් හා රිදවුම් පා කර එවු තැනය. මම මේසයක් මත වරුවක් ඉරි ඇන්ද තැනය. ඔබ ප්ලෙන්ටී බිව් තැනය. මම කුල් ඩ්‍රින්ක්ස් බිව් තැනය. මෙතැන මට හොඳින් මතක හිටි තැනය.

දැන් මම පහු කෙරුවේ දවසක පැයකුත් විනාඩි දහතුනක් අප නිහඬව හිඳි තැනය. වැහි බිංදු බර වැඩිව මැයි මල් පෙති බිම වැටුණු තැනය. වැහි බිංදුත් මල් පෙතිත් තරගයට ඔබ හිස සිපගත් තැනය. කුඩය යට සිට වැහි බිංඳු වලට මම අත පෑ තැනය. ඔච්චමට ඔබ හිනා උන තැනය. ප්‍රතිචාර ලෙස මම රවා බැලු තැනය. මෙතැන වැස්සට අදත් මම නවතින තැනය.

දැන් මම පහු කෙරුවේ කාමර කුලීයට දෙන තැනය. ඔබ මගේ අත තද කර මිරිකු තැනය. ඇස් අගින් ලොකු අකුරු පෙන්නු තැනය. මම අත ගසා දැමු තැනය. "පිස්සුදැයි" පෙරලා ඔබෙන් ඈසු තැනය. ඔබ ඉක්මණින් නොපෙනී ගිය තැනය. මෙතැන හිත ගැස්සෙන තැනය.

දැන් මම පහු කෙරුවේ ලංකා බැංකුවේ ඒ.ටී.එම්. මැෂිනය තිබෙන තැනය. ඔබෙන් කෙටි පණිවිඩයක් ලැබු තැනය. මම නැවති හදිසියෙන් එය කියවු තැනය. ජංගමය බිම වැටුණු තැනය. මම යතුරු පැදියක ගැටුණු තැනය. සිහිසුන්ව වැටුන තැනය. මෙතැන කඳුලක් ඇහැට උනන තැනය.

දැන් මම පහු කෙරුවේ ජිවිතේ අහම්බයක් වුන තැනය. ඔබ අතින් අල්ලන් ඇයව දුටු පළමු තැනය. 
ඔබට දමා ගසන්නට සිතින් වචන ඇහිලු තැනය. ඔබ පිටු පසින් මවෙත ඉඟි කරන දෑසක් දුටු තැනය. ඔබට හදවතින් සමාව දුන් තැනය. සියල්ල ගැන වරක් සතුටට පත් වු තැනය. මෙතැන අද ද ඒ දෙඈස් හොයන තැනය.

4 comments:

  1. ම්... ම්... ම්...
    යාත්‍රා... මේක කවි පන්තියකට නැත්නම් සින්දුවකට ගැළපෙන අදහසක් වගෙයි. ලස්සන නිර්මාණයක්.

    ජයවේවා!!!

    ReplyDelete
    Replies
    1. ගොඩක් ස්තුති දුමී. කාලෙකින් මේ පැත්තට ආවේ. කියවන්න දේවල් ගොඩයි.

      Delete

කැමැත්තෙමි

මම ලියන්නට කැමැත්තෙමි. මහ පොළව මත හිද , මහ විසල් අහස ගැන....   මම සිතන්නට කැමැත්තෙමි. තත්පරත් මියෙන අවකාශයක සිට , හිතක නොමියෙන සිනහවන් ගැන.....