හෙට ඇවිත් පවසන්න

ඉර ඈත සැඟව යන්නේ
ක්ෂිතිජයත් පසුකරම විය යුතු ය.

හෙට ඇවිත් පවසන්න,
ඒ ගගන සිප ගන්න විට
මේ සයුර නිසලවම උන්නා ද
නැතොත් සයුර හද නැගුන
සුසූම් සුළි දුටුවා ද

බිදෙන මේ රළ පෙළ
අතුල් පහරකි වෙරළ කිව්වට  
මට හිතෙන්නේම දියඹ සිට  
අරන් එන්නේම ආදරේ වග

ඒ නිසාමනේ
වෙරළ මා තැබු සලකුණක්
එසැණවිත් මකා දැම්මේ රළත්,

ඉර ඈත සැගව යන්නේ,
මේ සයුර, එ් ගගන සිප ගන්න තැන පසු කරද
හෙට ඇවිත් පවසන්න,
මටත් වෙරළෙන් සමු ගන්න..

ඉවුර

ජීවිතය

පදවන තොටිය...

යළිත් යා යුතුය

අතෑර ආ ඉවුර වෙත...

වසන්තය ඇහැරුණද

මේ ඉවුර

ඒ ඉවුර වෙයි

හදවතේ මල්

පිපෙන රහස...

ජිවිතය

පදවන තොටිය...

ඉතිං මා,

ගෙන යන්න ඒ ඉවුර...

ඔබේ හඬ

ඔබේ හඬ  පාව එන්නේ කොහෙන්දැයි දැන ගන්න

පියවරකට පසු පියවරකදී හැරි පිටුපස බලමි

එහෙත් එය මතුව එන්නේ හදවතේ එක්තරා තැනකිනි

ලබ් ඩබ්ව නැගෙන හඬ සමඟ එකට එකතුව පැටලවී

සමාවක් දිය හැකිද?

අමතකවිම් සියල්ලටම

සමාව දුන් පසුත්

තවදුරටත්

සමාවක් දිය හැකිද?

නින්දක අතරතුර

බඳා වැළද

අනියම් නමක් 

කියවෙන එකට

මා කුළුඳුල් හැඟුමකැයි රවටා

අෑ ප්‍රතිබිම්බ අදින එකට

ඉවසිය හැකි සියල්ලම

ඉවසු පසුවත්

තවදුරටත් 

ඉවසිය හැකිද?

බත ලිප තබා

ලිණි අවුලන්නට පිඹිනවිට

නුඹේ තොල් මතින්

පැරණි ගී මිමිණිම

සමහර දිනෙක සාක්කුවකින්

බස් ටිකට් දෙකක් හමුවීම

කිවයුතු සියල්ලම

කියා අහවර වු පසුවත්

තව දුරටත්

කීමට යමක් වේද?

දෑස් අඩවන් ව

නළලට වැටෙන

කෙහෙරැළි ඉවත් කර

“ආදරේයැයි” හෝ එසම වු වදනක්

නැතහොත්

“නවතින්නයැයි” හෝ එසම වු ඉඟියක්

නිදි කුම්බා

අල්ලපු ගමන් නින්දට වැටෙන ශාක ලොකේ නිදි කුමාරි තමයි නිදිකුම්බා කියන්නේ. ස්පර්ශයට සංවේදී පත්‍ර හා කටු සහිතයි. වල් පැළැටියක් විදිහට හඳුනගත්තත් නිදිකුම්බා කියන්නේ ඖෂධීය ගුණය සහිත පැළැටි විශේෂයක්. Fabaceae කුලයට අයිති වෙනවා කියලා තමයි විකිපිඩියා නම් කියලා තිබුණේ. අද උදේම මිදුලට ගියහම දැකපු නිදිකුමාරියන්ගේ නින්දට බධා නොකර තමයි, එයාලව පින්තුර ගත කර ගත්තේ.

                                              පිබිදීම

ඇහැරුණ නිදි කුමාරි

නිදි කුමාරි සහ තවත් අය

කටු, නටු හා මල්

කටු අකුලේ මල් ඇහැරේ

බලාපොරොත්තු එක්ක

පැටලීම

පරවීම

කඳුළු රදන පත්

නිදා යළි ඇහැරෙන

මම ආදරය කරමි

මම ආදරය කරමි
පිරිමින්ට මෙන්ම ගැහැණුන්ටත්
කඳුළු දැස් අගිස්සේ පුරවගත්ත ගැහැණුන්ට
දහදිහ පිහදමන පිරිමින්ට

මම ආදරය කරමි
බිළිදුන්ට මෙන්ම බිළිදියන්ටත්
කිසිඳු ලෝභ කමකින් තොරව සිනාසෙන බිලිඳියන්ට
දැස්තුළ සතුට තවරගත් බිළිදුන්ට

මම ආදරය කරමි
තරුණයින්ට මෙන්ම තරුණියන්ටත්
හෙට දවස වෙනුවෙන් ජිවිතය කැප කළ තරුණියන්ට
ජිවිත වෙනුවෙන් හඬ නගන තරුණයින්ට

මම ආදරය කරමි
අඳුරට මෙන්ම ආලෝකයටත්
වර්ණවත් දෑ පෙන්වන අඳුරට
අඳුරු දෑ පෙන්වන ආලෝකයට

මම ආදරය කරමි
අරගලයට මෙන්ම සාමයටත්
අයිතියක් රැකගන්න කරන අරගලයට
නිදහසේ සිනාවිය හැකි සාමයට

මම ආදරය කරමි
අහසට මෙන්ම සයුරටත්
විඩාබර නෙත් සඟවන්නට ඉඩක් ඇති අහසට
කඳුළු විසිකර දමන්නට හැකි සයුරට

මම ආදරය කරමි
ඔබට මෙන්ම මටත්
ආදරය නොහඳුනන ඔබට
ඒ වෙනුවෙන් නොහඬන මට