මේ ගමන දිගු වෙන්න පුළුවන්, කෙටි වෙන්නත් පුළුවන්
එහෙම දිගු,කෙටි ගමන් වල කළු, සුදු අහුමුළු සොයා පදවන යාත්‍රාව

Thursday, May 16, 2019

C ට ආදරෙන් 2019.04.16



ආදරණිය C,

අප වෙන් වී වසර ගණනකි. ඔබ කොහේ හෝ සිටින්නේ සතුටින් විය යුතුය. වස්සානය උදා වු පසුව වැටෙන වැහි මේ තරම් සුවදායක වන්නේ ඒ නිසාවෙනි. වැහි වැටෙන තැනක රැදෙන්නට ඔබ තවමත් කැමැත්තෙන්නම්, මගේ පුංචි කුටියේ කවුළුව තවමත් නොවැසුව වනම පවතී. ඉතිං ඔබ අනාරාධිතවම පැමිණෙන්න.

තුරල් වෙමින් පවතින වැස්ස ඔබ ගැන මතක සජ්ජායනය පටන් ගෙන ඇති බැවින් කුටියේ විදුලි පහන්  මා නිවා දමා අඳුර තුළ ගුළි ගැසීය යුතු ය. මා තුහින වැස්සට කැමති බව ඔබ දන්නවානේ. ඒත් C, මේ වැහි බිංදු වලත් තැවරි ඇතැයි  සිතන ප්‍රේමයක්, අහේතුකව මට පාළුවක් ගෙන එනවා. මා එය කොයි තරම් දරා ගත යුතුයි ද C ? ඔබ කියන්න, ඒ කොතෙක්ද?  එතෙක් මා මේ පාළුව දරන බවට අද ද ඔබට පොරොන්දු වෙමි. මේ වස්සානය ම එයට සාක්ෂිකරුවා කර ගන්න. මම වැස්සට කොතෙක් පෙම් කරනවාදැයි ඔබ දන්නවා නේද c. මා වඩාත් පෙම් කළ කිසිවකට බොරු නොකළ වග ඔබ හැරෙන්නට දන්නා කෙනෙකුන් ගැන මට සිතා ගන්නටවත් බැහැ. ආදරේ කරන දෑ හදවතට බොහෝ සමීප‍ තැනක බොහෝම පරිස්සමට බලා ගන්නට හැකි, මා හැරෙන්නට ඔබ දන්නා වෙනත් කෙනෙකුන් සිටිනවද C ? සිටිනවා නම් ඒ මගේ සන්තානයෙන් ඔබ සතුවු, ඔබ යළිඳු මට නොඳුන් කොටසක් විය යුතුමයි C.

වස්සානය උදා වී ඇත්තේ සිනාසීමටයි.ඉඳහිට ඔබ ලියන කවියක එසේ ලිය වෙනවා ඇති. මගේ සිනාව ඇත්තේ ඔබ සිනාසෙන තැනකනම් C, මට ඇහෙන්නට ඔබ සිනාසෙනවද? මටත් සිනාසිය හැකි පරිදි ඔබ ඔබේ සිනහවක් ඉතිරි කර යනවද?

වැහි අස්සේත් ඉදහිට තැනක පත්තු වෙන රතිඤ්ඤා හඬට තිගැස්සෙන කුඩා බලුපැටවා හෙම්බත්ව ගොසින් C. මේ ලියන මොහොතේ මගේ කකුල් දෙක ළඟ වැතිරගෙන ඌටම ආවේනික තාලෙකට මාත් එක්ක දුක බෙදා ගන්න උත්සහ කරනවා. කුඩා පැටවාගේ එක චලනයක වේගයෙන් මට ඌ හඳුනා ගත හැකිය C. ඒ විදිහට හෝ තමන්ගේ දුක බෙදා ගන්න කෙනෙකුන් සිටින එක මොනතරම් වාසනාවක්ද C? කුඩා පැටවා මට වඩා වාසනාවන්තයැයි ඔබත් සිතනවද C?

ඔබ නොමැති තැනක, ඔබේ අතැඟිලි වල උණුසුම නොදැනෙන තැනක, ඔබේ සිනහව මගේ දෑස් මතට නොවැටෙන විටක තවදුරටත් වාසනාව පිළිබඳ බලාපොරොත්තු දල්වා ගෙන හිද පලක් තියෙනවද C, මේ ලෙසටම වාසනාව මා වෙතට බොහෝ දුරකින් තිබුණාවේ. ඔබ කොතැන සිටියත් ඒ හිඳින තැන හිඳ ඔබේ සිනහවෙන් බිඳක්  සුළඟ හා මුහුව ආදර ගෙන ඔබට නොදන්වාම මා වෙතට පා  උනාවේ. මේ හදවතින් පතන පැතුමක් නොවන බව ඔබ දන්නව ද?. එය නැගෙන්නේ මගේ මුළු සන්තානයෙන්මයි. ඔබට එය ඇදහිය හැකිද C?


 A,
2019.04.16



4 comments:

  1. C ගැන විතරද මෙහෙම හිතෙන්නේ?
    මීට B

    ReplyDelete
    Replies
    1. ඔව් c ගැන විතරයි
      i ගැනවත් b ගැනවත් හිතෙන්නේ නෑ.

      Delete
  2. හිත දුකෙන් පිරැවූවත් ඉතා සුන්දර වචන!

    ReplyDelete

C ට ආදරෙන්

  ආදරණීය C, මේ වෙන්වීම මට දැනුනේ අපෙන් අපව තවත් දුරස් කරවන හැඟිමක්, ඔබව - මට වසර ගණනාවකින් හමුවෙලා නැහැ, ඔබ - මම වසර ගණනාවකින් කතාබහ කරලා නැ...