අයේෂා

අයේෂා ! යන්නම යනවා නම් යන්න
නවතිනවා නම් නවතින්න
සැර වැඩියි නම් මගේ වචන
ආයේ කතා නොකරම ඉන්න

එක වීදුරුවක් බිව්වයි කියලා
මිනිස්සු කොහෙවත් මැරුන්නෑ අයේෂා
එහෙම මැරුණ නම් එකෙක් හරි
අන්න උෟ තමයි එහෙනම්
මේ ලොකේ එකම එක වාසනාවන්තයා

කාච වලට හිනාවෙන මිනිස්සු
දන්නවද රෑට තනියෝම අඬනවා
ලොකුවටම ගන්න මඟුල්වලත්
වලං පිඟන් බිදෙනවා අයේෂා

විසඳුමක් නැති ජිවිත
ඕන තරම් තියෙනවා අයේෂා
දැක්කද මේ එඩිට් කළ පින්තුරේ
පෙන්නන්නද අයේෂා එත් එකේ
එකම එක හිස්තැනක් තියෙනවා

"පෝටෝග්‍රැෆර් ඔහොම බිව්වම
සව්ත්තු වෙලා ඇති පොටෝ සේරම
අනේ කොච්චර අපරාදෙ ද
ඒ කෙල්ලගේ ලස්සනම දවස"

අයේෂා මට දුකයි මං ගැන
ඒ තරමට ම උඹ ගැන
කියන්නේ කොහොමද
ඔන්න ඉස්සරම ඉස්සර
ලස්සනම ලස්සන දවස් තිබුණා
මෙන්න මේ මනමාලිටයි
මටයි විතරක් ම වෙන් වෙච්ච

අනේ ප්ලීස් අයේෂා
දැන්වත් ඔය ෆොන් එක තියෙනවද?
මේ වේලාවේ මට ඕන තනිවෙන්න
නුවරඑළියේ සීතලම සීතල විතරක්
මේ කාමරේ ඉදන් තනියෝම විඳගන්න